మంచిర్యాల జిల్లాలో అభివృద్ధి పనులకు మంత్రి వివేకానంద శంకుస్థాపన; సంక్షేమం, అభివృద్ధికి ప్రభుత్వం ప్రాధాన్యం

మంత్రి గడ్డం వివేకానంద మాట్లాడుతూ, ఇందిరమ్మ ఇండ్ల పథకం కింద ఆర్థికంగా వెనుకబడిన వారికి కాంట్రాక్టర్ల ద్వారా ఇళ్లు నిర్మించేందుకు అవకాశం కల్పిస్తున్నట్లు తెలిపారు. ఇళ్ల నిర్మాణ బిల్లులు సకాలంలో చెల్లించేలా చర్యలు తీసుకుంటామని హామీ ఇచ్చారు. గోత్రాల వాడకు రూ.1.60 కోట్లు, దాంపూర్ గ్రామానికి రూ.38 లక్షలు వివిధ నిధుల ద్వారా కేటాయించినట్లు పేర్కొన్నారు.

నీటి సమస్యల పరిష్కారానికి బోరు బావులు మంజూరు చేస్తామని, నర్సింగాపూర్ గ్రామంలో ఇప్పటికే 19 ఇందిరమ్మ ఇళ్లు కేటాయించామని, మరిన్ని మంజూరుకు చర్యలు తీసుకుంటున్నామని మంత్రి తెలిపారు. అర్హులైన నిరుద్యోగ యువతకు విదేశాల్లో ఉపాధి అవకాశాలు కల్పించి ఆర్థికంగా అభివృద్ధి చెందేలా చూస్తామని చెప్పారు.

జిల్లా కలెక్టర్ కుమార్ దీపక్ మాట్లాడుతూ, భీమారం మండలంలో రహదారుల నిర్మాణం, చెరువుల అభివృద్ధిపై ప్రత్యేక దృష్టి సారించామని తెలిపారు. విద్యుత్ సబ్ స్టేషన్ ఏర్పాటుకు చర్యలు తీసుకుంటున్నామని, మండల కేంద్రంలో ప్రాథమిక ఆరోగ్య కేంద్రం ఏర్పాటు చేస్తామని పేర్కొన్నారు. విద్యార్థుల సౌకర్యార్థం కస్తూరిబా గాంధీ బాలికల విద్యాలయంలో వసతి గృహం, అదనపు తరగతి గదులు, గ్రంథాలయాల ఏర్పాటు పనులు కొనసాగుతున్నాయని తెలిపారు. ఇందిరమ్మ ఇళ్ల నిర్మాణంలో దాంపూర్ గ్రామంలో పురోగతిని వివరిస్తూ, అర్హులైన వారికి మరిన్ని ఇళ్లు మంజూరు చేస్తామని హామీ ఇచ్చారు. ప్రభుత్వ నిబంధనల ప్రకారం ఇసుకను అందుబాటులో ఉంచుతామని, రేషన్ కార్డులు, ప్రభుత్వ పాఠశాలలు, అంగన్వాడీ కేంద్రాల అభివృద్ధికి చర్యలు తీసుకుంటామని కలెక్టర్ వివరించారు.