తెలంగాణ ప్రభుత్వం చేపట్టిన ప్రజా పాలన - 99 రోజుల ప్రగతి ప్రణాళిక కార్యక్రమంలో భాగంగా మంథనిలో నియోజకవర్గ స్థాయి కార్యక్రమం జరిగింది. రాష్ట్ర ఐటీ శాఖ మంత్రి దుద్దిల్ల శ్రీధర్ బాబు, పెద్దపల్లి ఎంపీ గడ్డం వంశీకృష్ణ హాజరై, లబ్ధిదారులకు సంక్షేమ చెక్కులను అందజేశారు.
మంథని ఆర్ఆర్ గార్డెన్, గంగాపురిలో జరిగిన ఈ కార్యక్రమంలో కాటారం, మహాముత్తారం, మహాదేవపూర్, మలహర్రావు, పలిమెల మండలాల పరిధిలోని లబ్ధిదారులకు కళ్యాణ లక్ష్మి, సీఎంఆర్ఎఫ్ చెక్కులను పంపిణీ చేశారు. అంగన్వాడీ టీచర్లకు మొబైల్ ఫోన్లు అందజేసి, ప్రభుత్వ సేవలు వేగంగా అందేలా చూడాలని సూచనలు చేశారు.
ఈ సందర్భంగా మంత్రి శ్రీధర్ బాబు మాట్లాడుతూ, సంక్షేమ పథకాలు అర్హులకు చేరడంలో అధికారులు అంకితభావంతో పనిచేయాలని, ప్రజలకు నేరుగా లబ్ధి చేకూర్చే లక్ష్యంతోనే ఈ కార్యక్రమాలు నిర్వహిస్తున్నామని తెలిపారు. లబ్ధిదారులతో నేరుగా మాట్లాడి వారి సమస్యలను అడిగి తెలుసుకున్నారు.
మహిళా సంక్షేమం, పేదల ఆర్థిక భద్రత, పిల్లల పోషణపై ప్రభుత్వం ప్రత్యేక దృష్టి సారించిందని మంత్రి వివరించారు. ఎంపీ గడ్డం వంశీకృష్ణ మాట్లాడుతూ, అకాల వర్షాల వల్ల నష్టపోయిన రైతులకు భరోసా ఇచ్చారు. తడిసిన ప్రతి ధాన్యం గింజను ప్రభుత్వం కొనుగోలు చేస్తుందని, రైతులు ఆందోళన చెందాల్సిన అవసరం లేదని స్పష్టం చేశారు.
ఈ కార్యక్రమంలో స్థానిక ప్రజాప్రతినిధులు, అధికారులు, పెద్ద సంఖ్యలో ప్రజలు పాల్గొన్నారు. కార్యక్రమానికి హాజరైన వారందరి సహకారంతో ఇది విజయవంతమైంది.
