ఎలకతుర్తి లోతట్టు ప్రాంత సమస్య పరిష్కరించాలి: అంబాల జగన్

లోతట్టు ప్రాంత కుటుంబాలు అనేక ఇబ్బందులు ఎదుర్కొంటున్నాయని, సరైన పరిష్కారం లభించడం లేదని అంబాల జగన్ తెలిపారు. ఎలకతుర్తి గ్రామంలోని ఎత్తైన ప్రాంతాల నుంచి వచ్చే వర్షపు నీరంతా లోతట్టు ప్రాంతంలోని ఇళ్ల వద్దకు చేరుతోందని, చిన్నపాటి వర్షానికే ఇళ్లలోకి వరద నీరు చేరి తీవ్ర ఇబ్బందులు పడుతున్నారని ఆయన పేర్కొన్నారు.

సరైన డ్రైనేజీ వ్యవస్థ, మురుగు నీటి కాలువలు, వర్షపు నీటి పారుదల వ్యవస్థ లేకపోవడం వల్ల సమస్య మరింత తీవ్రమవుతోందని, ముఖ్యంగా దళిత కుటుంబాలు నివసించే ప్రాంతంలో ప్రతి వర్షాకాలంలో నీరు నిలిచిపోవడంతో ఇళ్లలోకి వరద నీరు చేరుతోందని అధికారుల దృష్టికి తీసుకెళ్లారు.

ఈ సమస్యకు శాశ్వత పరిష్కారం కోసం ఉన్నతస్థాయి అధికారుల ఆధ్వర్యంలో ప్రత్యేక కమిటీ ఏర్పాటు చేసి, లోతట్టు ప్రాంతాన్ని పూర్తిగా పరిశీలించి, సమగ్ర డ్రైనేజీ మరియు నీటి పారుదల ప్రణాళిక రూపొందించాలని అంబాల జగన్ డిమాండ్ చేశారు.

గ్రామసభను కేవలం నామమాత్ర కార్యక్రమంగా కాకుండా, ప్రజల భాగస్వామ్యంతో సమస్యలను చర్చించి, పరిష్కార మార్గాలను రూపొందించాలని అంబాల జగన్ సూచించారు. గ్రామ ప్రజల సమస్యలను చర్చించి, తీర్మానాలు చేసి ఉన్నతాధికారుల దృష్టికి తీసుకెళ్లినప్పుడే గ్రామసభకు నిజమైన అర్థం ఉంటుందని తెలిపారు.

ఈ కార్యక్రమంలో అదనపు ప్రాజెక్ట్ డైరెక్టర్, స్పెషల్ ఆఫీసర్ ఆదిరెడ్డి, గ్రామ సర్పంచ్ మునిగడప లావణ్య, పంచాయతీ కార్యదర్శి శ్రీనివాస్, ఏపీఓ అనిత, ఈసీ శ్రీకాంత్, వార్డు సభ్యులు, సీఏ కవిత, అంగన్వాడీ కార్యకర్తలు, ఆశా కార్యకర్తలు, గ్రామ ప్రజలు తదితరులు పాల్గొన్నారు.