ఉపాధి హామీ కూలీల సంక్షేమం, ఆరోగ్య సేవలపై కలెక్టర్ ఆదేశాలు

జిల్లా కలెక్టర్ కుమార్ దీపక్ భీమిని మండలంలో ఉపాధి హామీ పని ప్రదేశాలను సందర్శించి, కూలీలకు అందుబాటులో ఉండాల్సిన సౌకర్యాలపై అధికారులకు సూచనలు చేశారు. పని ప్రదేశాలలో నీడ, త్రాగునీరు, ఓఆర్ఎస్ ప్యాకెట్లు, వైద్య సదుపాయాలు తప్పనిసరిగా కల్పించాలని ఆదేశించారు. ఉదయం 6 నుండి 11 గంటల మధ్య పనులు పూర్తి చేసేలా ప్రణాళిక రూపొందించాలని సూచించారు.

ఉపాధి హామీ పథకం ద్వారా మంజూరు చేసే పనులు, గ్రామ సభల ద్వారా గుర్తించిన పనుల నిర్వహణపై కలెక్టర్ సమీక్షించారు. ఇందిరమ్మ ఇళ్ల లబ్ధిదారులకు 90 రోజుల పని దినాలను కల్పించే అవకాశముందని, అలాగే ఇంకుడు గుంతలు, పశువుల షెడ్లు వంటి పనులను కూడా మంజూరు చేస్తామని తెలిపారు. పనుల నిర్వహణలో ప్రతిభ కనబరిచిన క్షేత్ర సహాయకులను ఆయన సత్కరించారు.

ప్రాథమిక ఆరోగ్య కేంద్రాలను సందర్శించిన కలెక్టర్, ప్రజలకు మెరుగైన వైద్య సేవలు అందించాలని, గర్భిణులకు ఆసుపత్రులలోనే ప్రసవాలు జరిగేలా అవగాహన కల్పించాలని సూచించారు. మందుల నిల్వలు, ఓఆర్ఎస్ ప్యాకెట్లు అందుబాటులో ఉంచుకోవాలని వైద్యులకు సూచనలు చేశారు. తహసిల్దార్ కార్యాలయంలో భూ భారతి దరఖాస్తుల ప్రక్రియను పరిశీలించి, సమస్యలను త్వరితగతిన పరిష్కరించాలని ఆదేశించారు.

గ్రామ సభలో మాట్లాడుతూ, పంచాయితీరాజ్ వ్యవస్థ ద్వారా గ్రామ అభివృద్ధికి ప్రభుత్వం కట్టుబడి ఉందని, ప్రజా ప్రతినిధులు ప్రజలకు జవాబుదారీతనంతో వ్యవహరించాలని కలెక్టర్ సూచించారు. అర్హులైన లబ్ధిదారులకు సంక్షేమ పథకాలు అందేలా చూడాలని, గ్రామ అభివృద్ధిలో ప్రజల భాగస్వామ్యం కీలకమని తెలిపారు.