మంచేరియల్, 2026-07-21
జన్నారం ప్రాథమిక ఆరోగ్య కేంద్రాన్ని జిల్లా వైద్య ఆరోగ్యశాఖ అధికారి డాక్టర్ నరేందర్ రాథోడ్ సందర్శించి, వైద్యులు, సిబ్బందితో ఆరోగ్య కార్యక్రమాలపై సమీక్ష నిర్వహించారు. వర్షాకాలంలో అప్రమత్తంగా ఉండాలని, కీటక, నీటి సంబంధిత వ్యాధులు ప్రబలకుండా జాగ్రత్తలు తీసుకోవాలని ఆయన సూచించారు.
జిల్లా వైద్య ఆరోగ్యశాఖ అధికారి డాక్టర్ నరేందర్ రాథోడ్ ఈరోజు జన్నారం ప్రాథమిక ఆరోగ్య కేంద్రాన్ని సందర్శించారు. ఈ సందర్భంగా ప్రాథమిక ఆరోగ్య కేంద్రం, తాళ్లపేట్, జన్నారం వైద్యులు, వైద్య సిబ్బందితో జాతీయ ఆరోగ్య కార్యక్రమాలు, ఇతర ఆరోగ్య కార్యక్రమాలపై సమీక్ష నిర్వహించారు.
జిల్లాలోని వైద్యులు, వైద్య సిబ్బంది వర్షాలు పడుతున్నందున సమయపాలన పాటిస్తూ ఆయా కేంద్రాలలో అందుబాటులో ఉండాలని, సమన్వయంతో పని చేయాలని డాక్టర్ నరేందర్ రాథోడ్ సూచించారు. ప్రభావిత ప్రాంతాలలో తక్షణమే చర్యలు తీసుకోవాలని, వైద్య శిబిరాలను ఏర్పాటు చేయాలని ఆదేశించారు. ఆశా, ఆరోగ్య కార్యకర్తలు ఇంటింటికి తిరిగి రోగుల వివరాలు సేకరించి, మందులు అందజేయాలని తెలిపారు.
ముఖ్యంగా కీటక జనిత వ్యాధులైన దోమల ద్వారా వచ్చే మలేరియా, డెంగ్యూ, చికెన్గున్యా వంటి వ్యాధులు ప్రబలే అవకాశం ఉన్నందున, దోమలు గుడ్లు పెట్టకుండా, పెరగకుండా, కుట్టకుండా జాగ్రత్తలు తీసుకోవాలని, దీనిపై అవగాహన కల్పించాలని సూచించారు. డెంగ్యూ, మలేరియా కిట్లను ఆయా ప్రాథమిక ఆరోగ్య కేంద్రాలలో అందుబాటులో ఉంచాలని ఆదేశించారు.
నీటికి సంబంధించిన అతిసారం, వాంతులు, విరేచనాలు, టైఫాయిడ్, కామెర్లు వంటి వ్యాధులు వచ్చే అవకాశం ఉన్నందున, గోరువెచ్చని నీటిని లేదా వేడి చేసిన నీటిని తాగాలని, మంచినీటిని జాగ్రత్తగా వాడాలని అవగాహన కల్పించాలని సూచించారు. ఐదు సంవత్సరాలలోపు పిల్లలు ఉన్న చోట్ల ఓఆర్ఎస్ ప్యాకెట్లను అందుబాటులో ఉంచాలని తెలిపారు.
గ్రామ పంచాయతీ సర్పంచులు, కార్యదర్శులు, అంగన్వాడీ కార్యకర్తలు, ఉపాధ్యాయులు, మహిళా ఆరోగ్య సంఘాలు, స్థానిక ప్రజాప్రతినిధుల సహకారంతో వ్యాధులు ప్రబలకుండా చర్యలు చేపట్టాలని కోరారు. ప్రతి వారం రెండు రోజులు (మంగళవారం, శుక్రవారం) ఇళ్లలో శుభ్రత చేసుకోవాలని, నీరు నిల్వ లేకుండా చూసుకోవాలని సూచించారు. ఎండాకాలంలో వాడిన కూలర్లు, ఇతర పడేసిన వస్తువులలో వర్షం నీరు నిల్వ ఉంటే దోమలు గుడ్లు పెట్టి లార్వాలు వృద్ధి చెందుతాయని, కావున 'డ్రైడే' పాటించాలని తెలిపారు.
జీవనశైలి మార్పులతో అసంక్రమణ వ్యాధులు వచ్చే అవకాశం ఉందని, 30 ఏళ్లు పైబడిన వారందరికీ బీపీ, షుగర్ పరీక్షలు చేసి, సరైన సమయంలో మందులు అందజేసి, అవగాహన కల్పించాలని సూచించారు. అన్ని రకాల మందులను ప్రాథమిక ఆరోగ్య కేంద్రాలలో అందుబాటులో ఉంచాలని, ఉపకేంద్రాల వారీగా మందుల వినియోగాన్ని రోజువారీగా పర్యవేక్షించాలని ఆదేశించారు. ఔషధాల వినియోగంలో రోజువారీ ఖర్చుల వివరాలను నమోదు చేయాలని, ప్రతి గ్రామంలో ఓఆర్ఎస్ డిపోలను అందుబాటులో ఉంచాలని సూచించారు.
వైద్యులు, ఆరోగ్య సిబ్బంది తమ పరిధిలోని పాఠశాలలు, హాస్టళ్లు, రెసిడెన్షియల్ పాఠశాలల్లో వైద్య శిబిరాలను ఏర్పాటు చేయాలని, ఆహార పదార్థాల పంపిణీ వివరాలను తెలుసుకుని అవగాహన కల్పించాలని తెలిపారు. క్షయ వ్యాధిగ్రస్తులను గుర్తించడంలో ముఖ్యపాత్ర పోషించి, వ్యాధిని త్వరగా గుర్తించి మందులు అందించడం ద్వారా క్షయవ్యాధిని నిర్మూలించవచ్చని అన్నారు. ఆరోగ్యమే మహాభాగ్యమని, వైద్యులు, వైద్య సిబ్బంది అందరి సమన్వయంతో చర్యలు చేపట్టాలని ఆదేశించారు.
