మంచేరియల్, 2026-08-01
మంచిర్యాల కార్పొరేషన్ పరిధిలోని సీసీసీ ఎక్స్ రోడ్ వద్ద ప్రపంచ ఆటో కార్మికుల దినోత్సవాన్ని ఘనంగా నిర్వహించారు. ఈ సందర్భంగా ఆటో కార్మికుల సమస్యలను ప్రస్తావిస్తూ, రాష్ట్ర ప్రభుత్వం తక్షణమే స్పందించాలని నాయకులు డిమాండ్ చేశారు. లేనిపక్షంలో ఆందోళనలు తీవ్రతరం చేస్తామని హెచ్చరించారు.
మంచిర్యాల కార్పొరేషన్ పరిధిలోని సీసీసీ ఎక్స్ రోడ్ కార్నర్ వద్ద ప్రపంచ ఆటో కార్మికుల దినోత్సవాన్ని పురస్కరించుకొని వివిధ ఆటో యూనియన్ల నాయకులు, కార్మికుల సమక్షంలో ఘనంగా నిర్వహించారు. ఈ సందర్భంగా జెండా ఎగరవేసి, కేక్ కట్ చేసి, మిఠాయిలు పంచుకున్నారు.
ఈ కార్యక్రమానికి ముఖ్య అతిథులుగా పొట్ట మధుకర్ (246/21/మంచిర్యాల జిల్లా ఆటో యూనియన్ అధ్యక్షులు), ఎండి హబీబ్ పాషా (BRTU మంచిర్యాల జిల్లా ఆటో యూనియన్ అధ్యక్షులు), భద్రం తిరుపతి (జిల్లా సీనియర్ నాయకులు), కల్వలా అంజన్న (మంచిర్యాల పట్టణ ఆటో యూనియన్ అధ్యక్షులు), ఎనగంటి సంపత్ (RKP ఆటో యూనియన్ అధ్యక్షులు), RK6 ప్రజాసేవ ఆటో యూనియన్ గౌరవ అధ్యక్షులు సిద్ధమల్ల ప్రసాద్, వర్కింగ్ ప్రెసిడెంట్ రొడ్డ సమ్మయ్య, బోగే సమ్మయ్య, కృష్ణ కాలనీ వర్కింగ్ ప్రెసిడెంట్ ఎట్టం శ్రీను, ప్రధాన కార్యదర్శి గుడికందుల శివ, బొబ్బల కుమార్, సీసీసీ ఆటో యూనియన్ ప్రధాన కార్యదర్శి బండారి వేణు గోపాల్, వైస్ ప్రెసిడెంట్ కొండ ప్రభాకర్, అవునూరి రాజయ్య, కోశాధికారి బండి బాలరాజు పాల్గొన్నారు.
ఈ సందర్భంగా నస్పూర్ టౌన్ నాయకులు మాట్లాడుతూ, మహిళలకు ఉచిత బస్సు ప్రయాణం వల్ల నష్టపోతున్న ఆటో కార్మికులను రాష్ట్ర ప్రభుత్వం విస్మరించిందని, వారి పట్ల మొండి వైఖరి అవలంబిస్తోందని విమర్శించారు. ప్రతి ఆటో డ్రైవర్కు రూ.30,000 ఆర్థిక సహాయం అందించాలని, రూ.1000 కోట్లతో ఆటో కార్పొరేషన్ ఏర్పాటు చేసి, ఆకలితో అలమటించి చనిపోయిన ఆటో కార్మిక కుటుంబాలను ఆదుకోవాలని రాష్ట్ర ప్రభుత్వాన్ని డిమాండ్ చేశారు.
ఇలాగే ఆటో డ్రైవర్ల పట్ల పక్షపాత ధోరణి కొనసాగితే, రానున్న రోజుల్లో వేలాదిమంది ఆటో డ్రైవర్లతో అసెంబ్లీని, స్థానిక ఎమ్మెల్యేల ఇళ్లను ముట్టడిస్తామని, రాస్తారోకోలు, ధర్నాలు చేస్తామని హెచ్చరించారు. రాష్ట్ర ప్రభుత్వం దిగిరాకుంటే, వేలాదిమంది ఆటో డ్రైవర్లు పురుగుల మందు తాగి ఆత్మహత్య చేసుకుంటామని తీవ్ర హెచ్చరికలు జారీ చేశారు.
ఈ కార్యక్రమంలో నస్పూర్ కాలనీ, సీసీసీ ఎక్స్ రోడ్ ఆటో యూనియన్, సీసీసీ ఆటో యూనియన్, కృష్ణ కాలనీ ఆటో యూనియన్, శ్రీరాంపూర్ ఆటో యూనియన్, RK 6 ఆటో యూనియన్ నాయకులు పాల్గొన్నారు. 'ఆటో కార్మికుల ఐక్యత వర్ధిల్లాలి' అని నినదించారు.
