మంచేరియల్, 2026-07-11
మంచిర్యాల నియోజకవర్గంలో జరుగుతున్న ప్రత్యేక సమగ్ర సవరణ (సర్) ప్రక్రియ నెమ్మదిగా సాగుతోందని, దీనిని వేగవంతం చేయాలని మాజీ శాసనసభ్యులు నడిపెల్లి దివాకర్ రావు గారు జిల్లా అధికారులను కోరారు. ఓటర్ల ఇబ్బందులను దృష్టిలో ఉంచుకొని, BLOలు మరింత చొరవ చూపాలని ఆయన సూచించారు.
మంచిర్యాల నియోజకవర్గంలో ప్రత్యేక సమగ్ర సవరణ (సర్) ప్రక్రియను జిల్లా అధికారులు వేగవంతం చేయాలని మంచిర్యాల మాజీ శాసనసభ్యులు నడిపెల్లి దివాకర్ రావు గారు కోరారు.
మంచిర్యాల జిల్లా కేంద్రంలోని తన నివాసం వద్ద ఏర్పాటుచేసిన విలేకరుల సమావేశంలో ఆయన మాట్లాడుతూ, నియోజకవర్గంలో ప్రత్యేక సమగ్ర సవరణ ప్రక్రియ నెమ్మదిగా జరుగుతోందని అన్నారు.
ఎన్యూమరేషన్ పత్రాలను BLOలు 08-07-2026 నాటికి 99 శాతం పంపిణీ చేసినట్లు నివేదిక ఇచ్చారని, అయితే దీనిని అధికారులు మరోసారి సవరణ చేసుకోవాలని తెలిపారు. BLOలు ఎన్యూమరేషన్ పత్రాలు పంపిణీ చేసిన తర్వాత, వాటిని నింపి తిరిగి BLOలకు ఇచ్చే బాధ్యత ఓటరు మహాశయులదే. అయితే, 2002 ఓటర్ లిస్టులో ఉన్నవారికి లేదా వారి కుటుంబ సభ్యుల ఓటును కనుగొనే ప్రక్రియలో ఓటర్లకు అవగాహన లేకపోవడంతో ఇబ్బందులు ఎదుర్కొంటున్నారు. అలాంటి వారికి BLOలు ప్రత్యేక చొరవ చూపించి, ఎన్యూమరేషన్ పత్రాలను నింపి తిరిగి తీసుకోవాలని సూచించారు.
అలాగే, ఎన్యూమరేషన్ పత్రాలను ఇంటింటికీ ఎలా ఇచ్చారో, అదే విధంగా తిరిగి తీసుకోవాల్సిన బాధ్యత BLOలదేనని ఆయన స్పష్టం చేశారు. ప్రతి ఇంటికి వెళ్లి ఎన్యూమరేషన్ పత్రాలను తీసుకునేలా జిల్లా కలెక్టర్ BLOలకు సూచించాలని కోరారు.
08-07-2026 నాటికి మంచిర్యాల నియోజకవర్గంలో దండేపల్లిలో 26.15 శాతం, లక్షెట్టిపేటలో 24.82 శాతం, హాజీపూర్ లో 22.91 శాతం, మంచిర్యాలలో 3.54 శాతం, నస్పూర్ లో 2.89 శాతం మాత్రమే ఎన్యూమరేషన్ పత్రాలు తిరిగి తీసుకున్నారని, మొత్తం నియోజకవర్గంలో 100 శాతానికి కేవలం 11.89 శాతం మాత్రమే పూర్తయిందని తెలిపారు. ఇదేవిధంగా కొనసాగితే గడువులోపు ప్రత్యేక సమగ్ర సవరణ పూర్తి కాదని ఆయన ఆందోళన వ్యక్తం చేశారు.
కావున, మంచిర్యాల జిల్లా కలెక్టర్ ప్రత్యేక సమగ్ర సవరణ ప్రక్రియకు అదనంగా BLOలను కేటాయించాలని కోరారు. నియోజకవర్గంలోని ఓటర్లందరూ ప్రత్యేక సమగ్ర సవరణకు సహకరించి, ఓటు నమోదు చేసుకోవాలని విజ్ఞప్తి చేశారు.
జిల్లా యంత్రాంగం వెంటనే స్పందించి, సర్ ప్రక్రియ వేగవంతం అయ్యేలా చూడాలని, అవసరమైతే మరికొంతమంది BLOలను ఈ ప్రక్రియకు కేటాయించాలని సూచించారు. గడువు పూర్తయ్యే నాటికి ప్రతి ఓటరు ఎన్యూమరేషన్ పత్రాలను నింపి, ఓటు నమోదు చేసుకునేలా చూడాల్సిన బాధ్యత జిల్లా యంత్రాంగం మరియు జిల్లా కలెక్టర్ దేనని ఆయన అన్నారు.
