మంచేరియల్, 2026-11-21
లక్షెట్టిపేట్ మున్సిపాలిటీలో ఇందిరమ్మ కుటుంబ జీవిత బీమా పథకం కింద ఆన్లైన్ దరఖాస్తుల స్వీకరణను మంచిర్యాల ఎమ్మెల్యే కొక్కిరాల ప్రేమ్ సాగర్ రావు ప్రారంభించారు.
ప్రతి కుటుంబానికి భరోసా, ప్రతి ఇంటికి ఆర్థిక రక్షణే ఇందిరమ్మ బీమా లక్ష్యమని మంచిర్యాల శాసనసభ్యులు శ్రీ కొక్కిరాల ప్రేమ్ సాగర్ రావు అన్నారు. తెలంగాణ రాష్ట్ర ప్రభుత్వం ప్రతిష్టాత్మకంగా అమలు చేస్తున్న 5 లక్షల రూపాయల ఇందిరమ్మ కుటుంబ జీవిత బీమా పథకంలో భాగంగా లక్షెట్టిపేట్ మున్సిపాలిటీ పరిధిలోని 02వ వార్డులో ఏర్పాటు చేసిన ఆన్లైన్ దరఖాస్తుల స్వీకరణ ప్రక్రియను ఆయన ప్రారంభించారు.
ఈ సందర్భంగా ఎమ్మెల్యే స్వయంగా లబ్ధిదారుల నుంచి దరఖాస్తులను స్వీకరించి, ఆన్లైన్ విధానంలో నమోదు ప్రక్రియను ప్రారంభించారు.
ప్రతి పేద కుటుంబానికి ప్రభుత్వం అండగా నిలవాలనే సంకల్పంతో ముఖ్యమంత్రి శ్రీ రేవంత్ రెడ్డి గారి నాయకత్వంలోని ప్రజా ప్రభుత్వం ఇందిరమ్మ కుటుంబ జీవిత బీమా పథకాన్ని అమలు చేస్తోందని ఎమ్మెల్యే కొక్కిరాల ప్రేమ్ సాగర్ రావు తెలిపారు. కుటుంబంలో సంపాదించే వ్యక్తికి ఏదైనా అనుకోని ప్రమాదం జరిగితే ఆ కుటుంబం ఆర్థికంగా ఇబ్బందులు పడకూడదనే ఉద్దేశంతో ఈ పథకాన్ని రూపొందించారని పేర్కొన్నారు.
అర్హులైన ప్రతి కుటుంబానికి ఈ పథకం అందేలా అధికారులు, ప్రజాప్రతినిధులు సమన్వయంతో పనిచేయాలని ఆయన సూచించారు. అర్హులైన ప్రతి ఒక్కరూ ఈ అవకాశాన్ని సద్వినియోగం చేసుకోవాలని కోరారు. ప్రజల సంక్షేమమే తమ ప్రభుత్వ ప్రథమ ప్రాధాన్యత అని ఆయన స్పష్టం చేశారు.







