భారతదేశంలో రేర్ ఎర్త్ ఖనిజాల అన్వేషణ, వినియోగం అత్యవసరమని, ఎలక్ట్రిక్ వాహనాల (EVs) దిశగా దేశం పురోగమించాలని కార్మిక, ఉపాధి మరియు గనుల మంత్రి డా. జి. వివేక్ వెంకటస్వామి అన్నారు. మిడిల్ ఈస్ట్ లో నెలకొన్న యుద్ధ పరిస్థితులు, హోర్ముజ్ సముద్ర మార్గం మూసివేత వంటి పరిణామాలు ప్రత్యామ్నాయ ఇంధన వనరుల వైపు దృష్టి సారించాల్సిన ఆవశ్యకతను నొక్కి చెప్పాయని ఆయన తెలిపారు.
హైదరాబాద్లో ఇంజినీరింగ్ స్టాఫ్ కాలేజ్ ఆఫ్ ఇండియా (ESCI) ఆధ్వర్యంలో నిర్వహించిన “రేర్ ఎర్త్ ఖనిజాలు – ఎలక్ట్రిక్ వాహనాలు” జాతీయ సదస్సులో మంత్రి ప్రసంగించారు. రేర్ ఎర్త్ ఖనిజాల విషయంలో భారత్ తగినంతగా పరిశోధన చేయడం లేదని, ప్రపంచవ్యాప్తంగా జరుగుతున్న సాంకేతిక మార్పుల్లో ఈ ఖనిజాలు కీలక పాత్ర పోషిస్తున్నాయని ఆయన పేర్కొన్నారు.
భారత్ తన ఇంధన అవసరాలలో ఎక్కువ భాగాన్ని దిగుమతులపై ఆధారపడుతోందని, అంతర్జాతీయ మార్కెట్లో క్రూడ్ ఆయిల్ ధరల పెరుగుదల దేశ విదేశీ మారక నిల్వలపై భారీ భారాన్ని మోపుతోందని మంత్రి వివరించారు. 700 బిలియన్ డాలర్ల నిల్వలు ఉన్నప్పటికీ, ఇటువంటి సంక్షోభాల వల్ల అవి తగ్గిపోయే ప్రమాదం ఉందని ఆయన హెచ్చరించారు.
కొత్త సాంకేతికతలను స్వీకరించడం, ముఖ్యంగా ఎలక్ట్రిక్ వాహనాలను ప్రోత్సహించడం ద్వారా ఈ పరిస్థితిని అధిగమించవచ్చని మంత్రి సూచించారు. ఈ సాంకేతికతలకు రేర్ ఎర్త్ ఖనిజాలు అత్యంత ముఖ్యమని, ఈ రంగంలో భారత్ మరింత దృష్టి పెట్టాల్సిన అవసరం ఉందని ఆయన స్పష్టం చేశారు. ఈ సదస్సు ద్వారా రేర్ ఎర్త్ ఖనిజాలు మరియు ఎలక్ట్రిక్ వాహనాలపై అవగాహన పెరుగుతుందని ఆశాభావం వ్యక్తం చేశారు.
ప్రపంచ స్థాయిలో జరుగుతున్న రేర్ ఎర్త్ అన్వేషణలో భారత్ వాటా కేవలం 1 శాతమని, దేశం 6–7 శాతం వృద్ధిరేటును కొనసాగించాలంటే ఈ అన్వేషణను విస్తరించాల్సిన అవసరం ఉందని మంత్రి తెలిపారు. యువ ఇంజినీర్లు ఈ రంగంలో ముందడుగు వేయాలని, కొత్త ఆవిష్కరణలకు కృషి చేయాలని ఆయన పిలుపునిచ్చారు. ఈ దిశగా తెలంగాణ ప్రభుత్వం పూర్తి మద్దతు అందిస్తుందని హామీ ఇచ్చారు.
