జిల్లా కలెక్టర్ ఆదేశం: ప్రభుత్వ పాఠశాలల్లో అభివృద్ధి పనులు వేగవంతం చేయాలి

జిల్లా కలెక్టర్ కుమార్ దీపక్ శనివారం లక్షెట్టిపేట మండల కేంద్రంలోని కస్తూరిబా గాంధీ బాలికల విద్యాలయాన్ని సందర్శించి, భోజనశాల, అదనపు గదుల నిర్మాణ పనులను పర్యవేక్షించారు. ఈ సందర్భంగా ఆయన మాట్లాడుతూ, ప్రభుత్వం విద్యారంగాన్ని బలోపేతం చేయడానికి కృషి చేస్తోందని, విద్యార్థులకు నాణ్యమైన విద్యతో పాటు అన్ని సౌకర్యాలు కల్పించాలని సూచించారు.

అన్ని ప్రభుత్వ పాఠశాలల్లో త్రాగునీరు, విద్యుత్, ప్రహరీ గోడ, మూత్రశాలలు వంటి కనీస సౌకర్యాలు తప్పనిసరిగా ఉండాలని కలెక్టర్ స్పష్టం చేశారు. విద్యార్థులకు అందించే అల్పాహారం, మధ్యాహ్న భోజనం మెనూ ప్రకారం నాణ్యతతో కూడినవిగా ఉండాలని సూచించారు.

కొత్త విద్యా సంవత్సరం ప్రారంభం నాటికి పాఠ్యపుస్తకాలు, ఏకరూప దుస్తులు విద్యార్థులకు అందేలా చూడాలని అధికారులను ఆదేశించారు. అభివృద్ధి పనుల్లో జాప్యం జరగకుండా వేగవంతం చేయాలని సూచించారు.

ఈ పర్యటనలో సంబంధిత అధికారులు కలెక్టర్‌తో పాటు ఉన్నారు.