మంచేరియల్, 2026-08-05
మంచిర్యాల జిల్లాలో ప్రజావాణి కార్యక్రమంలో ప్రజల నుండి అందిన దరఖాస్తులను క్షేత్రస్థాయిలో పరిశీలించి, త్వరితగతిన పరిష్కరించాలని జిల్లా కలెక్టర్ కుమార్ దీపక్ అధికారులను ఆదేశించారు. సోమవారం జిల్లా కార్యాలయాల్లో జరిగిన ప్రజావాణి కార్యక్రమంలో పలువురు అర్జీదారుల నుండి దరఖాస్తులను స్వీకరించారు.
ప్రజావాణి కార్యక్రమంలో అందిన దరఖాస్తులను క్షేత్రస్థాయిలో పరిశీలించి త్వరగా పరిష్కరించే విధంగా చర్యలు తీసుకోవాలని జిల్లా కలెక్టర్ కుమార్ దీపక్ అన్నారు. సోమవారం జిల్లాలోని నస్పూర్ లో గల జిల్లా కార్యాలయాల భవన సమావేశ మందిరంలో జిల్లా అదనపు కలెక్టర్లు పి. చంద్రయ్య, వి. రాములు, జిల్లా రెవెన్యూ అధికారి మోతి రామ్, ట్రైనీ డిప్యూటీ కలెక్టర్ విలాయత్ అలీ లతో కలిసి అర్జీదారుల నుండి దరఖాస్తులను స్వీకరించారు. ఈ సందర్భంగా వివిధ గ్రామాలు, పట్టణాల నుండి వచ్చిన ప్రజలు తమ సమస్యలను కలెక్టర్ దృష్టికి తీసుకువచ్చారు.
గ్రామ పంచాయతీ భవనం కూల్చివేతపై విచారణ
కాసిపేట మండలం ధర్మారావుపేట గ్రామపంచాయతీ లోని 5వ వార్డు సభ్యుడు ఏనుగు జనార్దన్ రెడ్డి తన దరఖాస్తులో గ్రామ సర్పంచ్ ఎలాంటి ప్రభుత్వ ఉత్తర్వులు, గ్రామపంచాయతీ తీర్మానం చేయకుండా ఏకపక్షంగా పంచాయతీ భవనాన్ని కూల్చివేసి, కార్యాలయ రికార్డులను భద్రపరచకుండా నిర్లక్ష్యం చేయడంపై తగు విచారణ జరిపి చర్యలు తీసుకోవాలని కోరారు.
విద్యార్థికి సీటు కోసం వినతి
మంచిర్యాల పట్టణంలోని జవహర్ నగర్ కు చెందిన దేవి సుమలత తన కుమారుడికి 5వ తరగతిలో సీటు ఇప్పించాలని కోరుతూ అర్జీ సమర్పించారు.
సాదా బైనమాపై పట్టా మంజూరు చేయాలని విజ్ఞప్తి
జైపూర్ మండలం వేలాల గ్రామానికి చెందిన ప్యాగ శారద తన తాత సాదా బైనమా ద్వారా భూమి కొనుగోలు చేయగా 30 సంవత్సరాలుగా సాగు చేసుకుంటున్నామని, 2020లో సాదా బైనమా పై దరఖాస్తు చేసుకున్నామని, పట్టా మంజూరు చేయాలని కోరుతూ దరఖాస్తు అందజేశారు.
రికార్డులలో సీలింగ్ పట్టాగా చూపుతున్న భూమి సవరణ
జైపూర్ మండలం నర్సింగాపూర్ గ్రామానికి చెందిన లక్కాకుల నర్సింగం తనకు గ్రామ శివారులో పట్టా భూమి ఉందని, ఇట్టి భూమి రికార్డులలో సీలింగ్ పట్టాగా చూపుతోందని, సవరించాలని కోరుతూ అర్జీ సమర్పించారు.
నస్పూర్ కాలనీ వాసుల సమస్యలు
నస్పూర్ మున్సిపల్ పరిధిలోని అభినవ కాలనీ వాసులు తమ కాలనీలో రహదారి నిర్మాణం, నీటి నిల్వల నివారణ, వీధి దీపాల ఏర్పాటు, కనీస సదుపాయాలు కల్పించాలని కోరుతూ దరఖాస్తు అందజేశారు.
సాదాబైనమా దరఖాస్తులో పొరపాటు సవరణ
కోటపల్లి మండలం రాజారాం గ్రామానికి చెందిన సేదం సంతోష తాము సాదాబైనమా కొరకు మీ-సేవ లో దరఖాస్తు చేసే సమయంలో జరిగిన పొరపాటును సవరించేందుకు అవకాశం కల్పించాలని కోరుతూ అర్జీ సమర్పించారు.
